又係搬過來之前既事。話說當時研究點樣煲紅豆沙，初步有Ｄ成績。心思思，想整埋湯圓，咁就可以「紅豆沙湯圓」拿出來見人。
二話不說，整湯圓的最主要材料 ─ 糯米粉買左返來。不過個餡點整呢？就無定案。於是個湯圓就咁不了了之。
難得又有兩日中秋假，自己又一個孤家寡人咁留o係屋企，無理由唔搵Ｄ野俾自己做下，於是上網睇下人地點整，自己又跟住整。
尋日星期六，本來應該返長週既，好在遇o岩中秋節假期。
由於已經習慣左早起返工的時間，尋日我八點半就起左身。姚記去左台灣旅行、樹熊又未起身，我無所事事，就洗衫啦；晾埋；沖左個涼；再上網打左陣機。好不容易先捱到十二點幾一點。樹熊起身，話我知約左鏗叔，無耐就出左去。
搬過來之前o係舊屋果陣，買落好多麵粉。驚會過期的關係，於是一直都Ｄ用Ｄ麵粉整野食，想快用晒佢。本來諗住用來自己搓舊粉整Pasta。
點知打開雪櫃，想搵隻蛋睇下都無...本身都係唔打算出街先諗住自己煮。算啦，決定求期搵包公仔麵味精粉開水，溝麵粉煎個薄撐當午餐算數。
