昨晚第 72 期六合彩金多寶，四千一百幾萬既頭獎終於都俾人捧走左。少有地，為了這次金多寶；為了不放過任何一個令自己富有的機會，我在投注前竟做足功課，結果其中一注中個廿蚊安慰獎。因為前後買左三張半飛，埋單計數反而蝕左 50 蚊。
不少人都會預測六合彩黎緊一期開咩號碼。當然，會有好多人堅持相反意見：『咪玩啦，Random架嘛！每個波出現的機會均等，邊有得預測既呢！』如果有得預測，白小姐、曾道人一早發左，唔駛期期出書教人捉路啦！你估出書真係好易賺！？
之但係，如果結果真係 Random 既話，經過一段長時間後，每個號碼的攪出次數應該好平均先岩，實情卻唔係呢回事，的而且確有好多號碼的出現機率高ｄ，有ｄ號碼就廿幾三十幾期先開得一兩次。根據馬會網頁公佈，由 2002 年 7 月至尋日為止，出現最多的號碼是 22 號，有 148 次；最少的則是 46 號，只攪出過 91 次。6 年間每年 150 次攪珠，最高和最低之間出現 50 多次的差距！如果話每個波的機會相等，其實真係講唔通。
就因為「每個波出現的機會不是均等」這個信念，有好多人竟然好有心機，以統計方式研究出好多理論／假說出黎。其中最多人相信的幾個理論，分別是： 1. 缺一門派別、2. 尾碼相同派、3. 重覆號碼派、4. 邊緣數理論；同埋 5. 近十期走勢分析、6. 聰明組合。這次我就好認真咁分析過「缺一門」理論，想同大家分享下自己既睇法。
何謂「缺一門」？
「缺一門」其實係一種在過往六合彩攪出結果統計數據中觀察到的現象。當代最著名的支持者，是在 Yahoo! 有 Blog 的連理枝先生。他早在 2000 年，便留意到此現象。
要了解甚麼是「缺一門」，先要解釋「門」的觀念。現時的六合彩是由 49 個號碼組成的。如果把 0-9 號視為第一組、10-19 視為第二組、20-29 視為第三組，如此類推... 那所有號碼便可分成五組，稱之為「五門」。睇返以往開彩紀錄，好容易發現好多時每期開出的七個號碼（包括特別號碼），總不會包含全部五門。例如尋晚第 72 期，開 8, 33, 39, 40, 46, 48 + 24，就缺少了「10-19」那一門。
睇返過往的幾百期攪珠結果做統計後，會發現缺一門的情況，出現率的確達八成以上。如果投注時買少那 10 個唔開的號碼，咁就唔係在 49 個波內揀 6 個號碼；而係在 39 個波裡面揀 6 個波。就算你無買果一門而佢最後又開左，以每一門平均都係出一至兩個號碼而言，你在 39 個號碼中揀到 4 至 5 個號碼，贏面都較在 49 個號碼度揀高一點。
「係，80% 以上出現這情況，在統計層面係好 Significant。但係，我點知o黎緊果期會開少邊一門呢？」於是，在這個問題啟發下，連理枝再做左進一步的統計，分析如果呢期缺左某一門之後，咁下一期最常會缺的是哪一門呢？如是者，整個缺一門理論／假說便出爐了。據說，缺一門的選波方法不一定能增加上六合彩的機會率（始終係運氣主導），不過可以令你揀號碼時花少ｄ時間。
一心想講o既反而係，缺一門現象點解會有高達八成以上的出現率？咁神奇？
其實深入分析之後，會發現呢個統計數據，有偷換概念之嫌。先唔好講能否正確預測下期缺哪一門，如果我把資料咁 Present，可能就會容易明白得多：
每期六合彩攪珠出現的可能性如下：
可能性一： 缺第一門，「0-9」沒有號碼攪出
可能性二： 缺第二門，「10-19」沒有號碼攪出
可能性三： 缺第三門，「20-29」沒有號碼攪出
可能性四： 缺第四門，「30-39」沒有號碼攪出
可能性五： 五門都有號碼攪出，或者缺超過一門
換一個角度講，每期攪珠唔出現缺一門現象的機會，約為 20% 以內（1 - 八成以上）。即係話，呢個「八成以上」，係由可能性一至四加總起來而成的。除返開，每個可能性平均機率也是 20% 左右。
「車！計完一大輪，原來五個可能性出現的機會幾乎是均等的。」沒錯，就是這麼一回事。整件事真係好鬼費城實驗：ｐ
好喇，缺一門現象原來無咩特別就算喇。咁買六合彩時，如果買少一門，又係咪一個好策略呢？又等一心俾個懶係科學既模型俾大家睇下：
假設，我地每期六合彩係在 5 組號碼裡面抽六個出來。為方便解釋，我地就用平均值計，當成每組裡面將會抽出 1.2 個波。唔好問我點樣每組抽果 0.2 個波，話明係模型，當然係唔真實既。
第一組 1.2
第二組 1.2
第三組 1.2
第四組 1.2
第五組 1.2
就當我地突登唔揀第五組。其實我地點揀波並唔影響攪珠結果，第五組依然有機會出果 1.2 個波（因為任何一組的機會仍是均等的）。只是，我地失去了中第五組波的機會。這可以視為開全門時，我地的投注情況。
第一組 1.2
第二組 1.2
第三組 1.2
第四組 1.2
第五組 《投注時已放棄中第五組波的機會》
你都仲有平均機會中晒 4.8 個波。好喇，如果唔係開全門，而係缺另一門呢？假設結果係缺第二組好了，你買左第二組的號碼，不過佢一個都無開過，咁唔代表果 1.2 的機會可以攤分到其他組別去。因為第二組你係有投注、有揀到波既，果 1.2 個波既機會即係變左 Sink Cost。
第一組 1.2
第二組 《沒有波攪出，但你有揀波》
第三組 1.2
第四組 1.2
第五組 《投注時已放棄中第五組波的機會》
你平均最多中到 3.6 個字。根據以上模型話你知，用缺一門買六合彩，如果揀錯門，就算係幾好運，頭二三四獎都唔會有你份。其實，咁買六合彩要贏錢即係變成玩過兩關，第一關係要揀岩門唔買，5 揀 1，過左第一關之後，才是論理裡提到的 39 揀 6。
我數學麻麻，唔知咁樣計機會率有無錯（煩請 Ms. Wong 指正下 ^_^）：
傳統投注方法： (1 / 49) * (1 / 48) * (1 / 47) * (1 / 46) * (1 / 45) * (1 / 44) = 9.93212E-11
缺一門投注方法： 1/5 * (1 / 39) * (1 / 38) * (1 / 37) * (1 / 36) * (1 / 35) * (1 / 34) = 8.51394E-11
仍是天文數字般的機會，我唔認為有幾大幫助就是了。下次有機會再同大家計下其他理論又有幾「堅」先！
