話說，尋日上、下畫都要去見工。車程太趕，時間太匆忙，期間都沒有時間吃午飯。
下午在灣仔見完工，又要回葵芳舊公司把自己的兩箱「遺物」領回。到可以跟舊老細坐下來食個Tea的時候，已經是下午五點幾六點鐘。下午茶時段未過，可是對於油多西多、菠蘿油咖喱角春卷熱狗飛碟、焗飯意粉炸脾炸翼沙律薯條、炒粉麵那些下午茶餐，總是提不起興趣。反正主流東西之間拿不下主意，索性揀些冷門的，就點了個羅漢齋湯伊麵。
好好食。
羅漢齋，個人認為這道菜足以顯現出中國人的飲食文化和烹飪智慧。材料沒有嚴格規限，只要是齋菜便可。常見的有：雪耳、木耳、冬菇金菇等菌類、甘筍、葉菜，有時或會加入豆腐豆卜。主要都是一些粗貨，可是結合起來，竟是這樣的一種美味。
剛好家裡也有這些東西，今天把家裡打掃過一遍後，二話不說上網找食譜，自己做。
也許返新工之後，再沒有這般閒情逸致的了。
心齋
材料（大概是二人份量一碟咁上下）：
雪耳 一個。細細個的，浸起左會大，所以唔駛好多。
木耳（雲耳） 些少。我都唔知幾多，我諗有1/3至1/4個飯碗左右。
姬松茸 些少。其實用其他菇會靚ｄ，不過屋企無，用佢頂住先，8至10隻都好夠。
甘筍 適量。我選擇用中國紅蘿蔔，切左一截出來用，大概是直徑2吋圓柱x高度1吋左右。
娃娃菜 1/3棵。其實可以多ｄ，不過我一個人食，唔駛咁多啦。
薑片 三幾塊
調味料：
李錦記舊裝特級蠔油 1茶匙
糖 1茶匙
鹽 1/2茶匙
水 一杯（200毫升）
生粉水 適量
做法：
1. 雪耳用水浸軟，洗淨後瀝乾，撕碎成姆指指頭般大小。根部好黃果ｄ唔好要。
2. 雲耳浸透，洗淨後瀝乾，切成大概一蚊銀咁大。
3. 菇菌類洗淨浸軟，瀝乾去蒂，切成適當大小。
4. 甘筍切成約2cm x 4cm薄片。
5. 娃娃菜洗淨，切成跟甘筍差不多大小。
6. 雲耳加入1茶匙糖、少少麻油、生抽1茶匙撈均醃味。
7. 燒熱2湯匙油，炒香雲耳、雪耳和菇菌類，裝起備用。
8. 再燒1湯匙油，爆香薑片，加入甘筍及娃娃菜炒勻。再把之前的雲耳、雪耳和菇菌類倒回去兜勻。
9. 落調味料，加入1茶匙生粉開成的生粉水。猛火煮滾後轉慢火，蓋上鑊蓋炆10分鐘至汁水收乾，搞掂。
煮之前，我硬係好想切蒜頭，煮的時候，又硬係好想灒酒，硬係認為灒酒會香ｄ...呢ｄ可能就係齋口唔齋心了。^^
參考：
http://www.geocities.com/wongka_menu/vegetables/vege005
