尋日星期六，本來應該返長週既，好在遇o岩中秋節假期。
由於已經習慣左早起返工的時間，尋日我八點半就起左身。姚記去左台灣旅行、樹熊又未起身，我無所事事，就洗衫啦；晾埋；沖左個涼；再上網打左陣機。好不容易先捱到十二點幾一點。樹熊起身，話我知約左鏗叔，無耐就出左去。
搬過來之前o係舊屋果陣，買落好多麵粉。驚會過期的關係，於是一直都Ｄ用Ｄ麵粉整野食，想快用晒佢。本來諗住用來自己搓舊粉整Pasta。
點知打開雪櫃，想搵隻蛋睇下都無...本身都係唔打算出街先諗住自己煮。算啦，決定求期搵包公仔麵味精粉開水，溝麵粉煎個薄撐當午餐算數。
材料：
麵粉 一杯（用量杯量到200ml的份量）
溫水 一杯（200ml）多少少
即食麵海鮮湯味精粉 一包
蔥花 適量（我是用樽裝香草Chives頂替）
做法：
1. 溫水把味精粉融解，再同麵粉充份調均
2. 燒紅鑊，落2湯匙油
3. 油滾，把混合物倒落鑊煎香。到咁上下翻轉再煎
